L’accent grafic es un signe complementari que s’apond sus una vocala ; pòt èsser agut e se tròba pas que sus las vocalas barradas (« agenés », « teulís », « pegós », « gahús »…), o grèu e se tròba pas que sus las vocalas obèrtas (« pegàs », « castèth », « simbòl »…).

En occitan, dins un mot, l’accent grafic a un ròtle doble : marcar la tonicitat d’una vocala quand seguís pas los principis generals de l’accentuacion : « cantarà », « espés », « neurís », « díser », « dejós », « cóser », « dessús »… o senhalar que las vocalas /e/ e /o/ son a l’encòp tonicas e obèrtas, que lor tonicitat siá regulara (« carrièra /carrèra » ; « pòrta »…) o irregulara (« interès » ; « bòria »…).

Quand aquestas doas vocalas son pas plus tonicas, se barran (>[e] e [u]) e pèrdon lor accent escrich. Aquò se passa mai que mai dins d’unas conjugasons (vèrbes diches alternants) : « cercar », « cèrcas », « cercaràs »… ; « trobar », « tròbas », « trobaràs »…, e dins la derivacion nominala, adjectivala o verbala : « tèrra », « terrian », « terrejar »… ; « escòla », « escolar », « escolarizar »…

Maurici Romieu, vicepresident del conselh lingüistic del Congrès

Fòto : Sten Porse