Trobar l'imatge sus Commons

Los imatges utilizats sus Wikidata se tròban sul site Wikimedia Commons (⇒ commons.wikimedia.org).

Se volètz afichar l'interfàcia de Commons dins una autra lenga que l'anglés, vos cal aver creat un compte sus Commons (podètz utilizar lo de Wikidata), l'aver parametrat e vos i èstre connectat (⇒ tutorial). Val melhor utilizar lo francés que non pas l'occitan, que l'interfàcia en occitan es pas completament revirada, e los mots que mancan son en catalan.

Per cercar un imatge sus Commons, vos cal picar lo mot-clau dins lo camp de recèrca en naut a dreita puei clicar sus la lópia. Picatz puslèu de mots-claus en anglés, auretz mai de resultats.

Arribatz sus una pagina amb una lista de fòtos e de categorias. Clicatz sus l'imatge que pensatz la mai adaptada.

Se sètz sus la pagina de visualizacion de l'imatge, vos cal clicar sul boton « Mai de detalhs » (More details) en bas de la pagina.

Quand sètz sus la pagina amb los detalhs, copiatz lo nom de l'imatge (tot ç̀o que i a après « File: » dins lo títol de la pagina sus la quala sètz arribat). Se i a pas « File: » dins lo títol, es que sètz pas sus una pagina de fotografia. Cercatz-ne una autra.

Se volètz aver mai d'imatges pertinentas d'un còp, podètz ensajar de veire se vòstre mot-clau a una categoria. Per aquò far, picatz « Category: » puèi vòstre mot-clau en anglés.

Se i a pas d'imatges que vos convenon, ne podètz importar (⇒ tutorial).

Ajustar l'imatge sus Wikidata

Tornatz sul site de Wikidata. Per ajustar un imatge, clicatz sus « Ajustar una declaracion » en bas de la seccion « Declaracions ».

Una bóstia se dobrís amb un camp « proprietat ». Començatz de picar « image » dins lo camp. Normalament, lo menut desrotlant deu prepausar « Imatge. Imatge illustrant l'element ». Clicatz dessús.

Avètz ara un novèl camp, per dintrar l'imatge. Pegatz-i lo nom del fichièr qu'avètz copiat sus Commons.

Al cap de qualques secondas, una lista apareis amb los imatges que correspondon al nom del fichièr. Clicatz sus los qu'aviatz causit.

Clicatz sus « Publicar » a dreita del nom del fichièr.

Se tot s'es passat coma cal, l'imatge deuriá aparéisser sus vòstre dossièr multimèdia.

Podètz atribuir mantun imatge a un itèm Wikidata, mas n'i aurà pas qu'un qu'apareisserà sus la pagina del dossièr multimèdia.