Arcuelh

Utís pedagogics

Fargar un dossièr multimèdia amb los otisses de Wikimedia

Tornar al tutorial general

Ajustar de proprietats a un concèpte Wikidata

Abans de modificar un itèm sus Wikidata, cal aver creat un compte, l'aver parametrat e s'i èstre connectat (⇒ tutorial).

Procediment general

Per ajustar una informacion, clicatz sus « Ajustar una declaracion » en bas de la seccion « Descripcion ».

Una bóstia se dobrís amb un camp « proprietat ». Començatz de picar lo nom de la proprietat (ex. : data de naissença, natura de l'element...). Una lista de suggestions apareis en-dejós del camp. Clicatz sus la proprietat que volètz.

Per saber cossí causir las proprietats, veire en bas de pagina.

Avètz ara un novèl camp, per dintrar la valor de la proprietat. S'es un autre concèpte, començatz de picar son nom (ex. : instrument de musica de vent). Una lista de suggestions apareis en-dejós del camp. Clicatz sul concèpte que volètz. Se lo concèpte existís pas, lo vos cal crear (⇒ tutorial).

S'es un site web, una data... avètz pas qu'a lo/la picar.

Quand avètz lo bon concèpte e la bona proprietat, clicatz sus « publicar ».

Repetissètz aquela operacion per ajustar totas las informacions que volètz.

Atencion : se trobatz pas la proprietat o lo concèpte en picant en occitan, ensajatz en picant en francés o, eventualament, en anglés. Pauc de proprietats o de concèptes son revirats en occitan. Vos o calrà far (veire çai-jos).

Atribuir mantuna valor a una proprietat

Quand una proprietat correspond a mantun concèpte (ex. : lengas parladas), podètz ajustar un segond, tresen... concèpte en clicant sus « ajustar una valor ».

Seguissètz puèi lo procediment descriut çai-sus.

Balhar de precisions sus un parelh proprietat-valor (sus una afirmacion)

Podètz ajustar un qualificatiu per precisar una proprietat, per exemple, la data de fin a partir de la quala l'afirmacion es pas pus valida (coma quand indicatz l'ancian mestièr de qualqu'un).

Per çò far, clicatz sus « modificar » a dreita d'una afirmacion (la valor d'una proprietat) puèi sus « ajustar un qualificatiu ». Un camp de formulari apareis. Vos cal causir la proprietat que qualificarà l'afirmacion (data de debuta, data de fin, durada...). Podètz utilizar la proprietat « periòde » amb la valor « passat » per indicar qu'una afirmacion es pas pus valabla, sens balhar de precisions.

Quand avètz causit la proprietat, un novèl camp apareis. I podètz picar la data o la durada.

Podètz ajustar un autre qualificatiu en clicant sus « ajustar un qualificatiu ».

Quand avètz ajustat totes los qualificatius que volètz, clicatz sus « publicar » a dreita de l'afirmacion.

Sorsar una afirmacion (un parelh proprietat-valor)

Podètz voler ajustar una referéncia per indicar la sorsa d'una afirmacion. Per d'unas proprietats (ex. data de naissença), es obligatòri.

Per çò far, clicatz sus « ajustar una referéncia en-dejós de la valor d'una proprietat.

Causissètz puèi la mena de font :

Quand es bon, clicatz sus « publicar » a dreita de l'afirmacion.

Cossí causir las proprietats d'ajustar ?

Per saber quala mena d'informacions ajustar, çò mai simple es d'anar veire la pagina d'un itèm similar. Dobrissètz una novèla fenèstra, picatz l'adreça de Wikidata e recercatz un itèm similar (autra persona, autre instrument) dins la barra de recèrca en naut a dreita. Trobaretz çai-jos qualques listas de proprietats per vos ajudar.

Persona

  • natura de l'element : èstre uman
  • sexe o genre : masculin / feminin
  • país de ciutadanetat
  • prenom
  • nom de familha
  • data de naissença
  • luòc de naissença
  • data de mòrt
  • luòc de mòrt
  • fraire o sòrre
  • lenga mairala
  • lengas parladas, escriutas o signadas
  • lenga d'escritura
  • ocupacion (= mestièr)
  • sòci de
  • escolaritat
  • domeni d'activitat : cultura occitana
  • òbra notabla
  • instrument de musica practicat
  • genre (musical o literari)
  • site oficial

Véser los exemples Frédéric Mistral, Maud Séguier

Vila

  • natura de l'element : comuna de [país]
  • còdi postal
  • nom oficial
  • nom dins la lenga originala
  • gentilici
  • país
  • capitala de (pels caps-luòcs, per exemple)
  • localizacion administrativa : departament, canton...
  • banhat per : [riu]
  • coordonadas geograficas
  • cap de l'executiu : [conse]
  • populacion
  • altitud
  • fusèu orari
  • jumelatge o partenariat
  • limitròfe de
  • superficia
  • site oficial

Véser los exemples Tolosa, Marselha

Grop de musica

  • natura de l'element : grop de musica
  • data de fondacion o de creacion
  • luòc de fondacion
  • país d'origina
  • genre (musical)
  • compren (sòcis)
  • domeni d'activitat : cultura occitana
  • lengas parladas, escriutas o signadas
  • debuta del periòde d'activitat
  • fin del periòde d'activitat
  • òbra notabla
  • labèl discografic
  • influenciat per
  • site oficial

Véser los exemples Barrut, Les Ogres de Barback

Libre

  • natura de l'element : òbra escriuta
  • data de publicacion
  • subjècte o tèma màger
  • autor
  • lenga de l'òbra, del nom o del tèrmi
  • genre (literari)
  • editor
  • país d'origina

Véser los exemples Mirèio, Contes dels Balssàs

© Lo Congrès Permanent de la Lenga Occitana, 2018, Totes los dreits reservats