Arcuelh

Utís pedagogics

Fargar un dossièr multimèdia amb los otisses de Wikimedia

Tornar al tutorial general

Redigir un article Wikipèdia

Abans de redigir lo contengut d'un article sus la Wikipèdia, es melhor d'aver creat un compte, l'aver parametrat e s'i èstre connectat (⇒ tutorial). Mas es pas obligatòri.

Lo contengut

Totes los articles de la Wikipèdia començan per un o mantun paragrafe d'introduccion (es aquò qu'es afichat dins nòstre dossièr multimèdia). Las diferentas seccions seguisson puèi.

Cada seccion comença per un títol. I a mantun nivèl de títol, que permeton de far de jos-seccions.

Lo somari es fait automaticament a partir dels títols de seccion que creatz, avètz pas besonh de ne vos ocupar.

L'article deu èstre redigit dins un estile enciclopedic (⇒ ne saber mai).

L'interfàcia d'edicion

I a dos biais d'editar una pagina :

Quand sètz prèst a publicar vòstras modificacions, clicatz sus « Publicar las modificacions » en bas de la pagina. I a pas besonh d'esperar que l'article siá acabat per salvagardar. Podètz salvagardar après aver picat qualques frasas sonque.

Los ligams

Es important, quand òm legís un article Wikipèdia, de poder accedir als articles que pertòcan las causas que i son mençonadas. Aquò se fa mercés a de ligams dits « intèrnes » (⇒ cossí far un ligam intèrne ?). Cal far un ligam intèrne a cada còp qu'escrivètz un mot que correpond a un autre article de la Wikipèdia (en general un nom de persona o de luòc, un eveniment, un títol d'òbra...)

Mas poiretz tanben aver besonh de remandar a de sites internet fòra la Wikipèdia. Utilizaretz per aquò de ligams dits « extèrnes » (⇒ cossí far un ligam extèrne ?).

Enfin, podètz voler far de ligams de cap a de paginas Wikipèdia dins d'autras lengas (⇒ mòde d'emplec) o de cap a d'autres projèctes de Wikimedia (Wikidata, Commons...) (⇒ mòde d'emplec).

Las referéncias

Quand redigissètz, vos cal indicar la font de vòstras informacions. Per aquò far, inseritz de referéncias (⇒ mòde d'emplec).

Causir las categorias de la pagina

Cada pagina Wikipèdia dèu èstre restacada a almens una categoria. Per saber a qualas categorias restacar vòstra pagina, podètz anar veire una pagina similària. Per exemple, per categorizar la pagina « Lop », podètz anar veire dins qualas categorias es recaptada la pagina « Can ».

Podètz tanben cercar de categorias amb lo motor de recèrca (⇒ tutorial) o crear una novèla categoria (⇒ tutorial).

Quand sabètz quala(s) categoria(s) volètz atribuir a la pagina, vos cal passar en editor de còdi amb lo boton « Modificar la font » en naut a dreita de l'article. Davalatz a la tota fin de l'article, e ajustatz lo còdi [[Categoria: nomdelacategoria]] en remplaçant nomdelacategoria pel nom de la categoria causida. Se avètz causit mantuna categoria, picatz mantun còp aquel còdi.

Illustrar l'article

Podètz illustrar l'article en inserint a mantun endreit de fotografias gessidas de Wikimedia Commons (⇒ tutorial).

Podètz tanben inserir una galariá compausada de mantun imatge (⇒ tutorial).

Per aprigondir

Esitatz pas a consultar l'ajuda de la Wikipèdia en francés (=> veire) qu'es fòrça completa e plan organizada.

Aquela prepausa tanben una seria de vidèos de tutorial (=> veire) per apréner a contribuir.

La pagina d'acuèlh dels començaires (=> veire), totjorn sus la Wikipèdia en francés, vos pòt tanben balhar d'indicacions utilas.

La comunautat francofòna prepausa tanben un chat ont los contributors pòdon anar pausar de questions (=> ne saber mai).

Los contibutors occitans son malurosament pas pro nombroses per prepausar totes aqueles servicis.

© Lo Congrès Permanent de la Lenga Occitana, 2018, Totes los dreits reservats