Arcuelh

Utís pedagogics

Fargar un dossièr multimèdia amb los otisses de Wikimedia

Podètz crear un dossièr multimèdia qu'aficha, per un itèm, l'introduccion de son article dins la Wikipèdia occitana, un quadre amb sas informacions enregistradas sus Wikidata e un album amb sas fòtos de Wikimedia Commons.

Aquela mena de projècte demanda a l'ensenhaire d'èstre un pauc a d'aise amb l'informatica. Dèu èstre capable de crear un compte sus un site e de s'i connectar, de dobrir mantun onglet dins un navigator, de saber utilizar un motor de recèrca dins un site...

Accedir a un dossièr multimèdia

A partir d'un QID de Wikidata

Dintrar un QID (véser etapa 1) :

Véser d'exemples

Trobaratz çai-jos las etapas de seguir per crear un dossièr multimèdia, amb de ligams de cap a de tutorials detalhats se sabètz pas cossí far.

Etapa 1 : trobar o crear l'element Wikidata

Per recuperar lo QID d'un element, vos cal anar sus www.wikidata.org. Vos cal cercar l'element amb lo motor de recèrca en naut a dreita (⇒ tutorial).

Quand arribatz sus la pagina de l'element, trobatz son QID en naut de la pagina, entre parentèsis, après lo títol. Es compausat d'una Q seguida de chifras (ex. : Q18498 per Lop).

Se l'element existís pas, lo vos calrà crear (⇒ tutorial).

Etapa 2 : emplenar l'itèm Wikidata

Es un trabalh que pòt èstre fait per d'escolans qu'an un nivèl de lenga pro bas (cal poder picar de seguidas de mots cortetas).

Ajustar de proprietats

Cal ajustar d'informacions (parelhs proprietats - valors) a l'itèm Wikidata, se sabètz de causas que son pas ja dins la basa (⇒ tutorial).

Revirar de proprietats

Se d'unes camps, dins l'enquadrat del documentari, s'afichan en francés o en anglés, los cal revirar. Es pas fòrça complicat de revirar lo títol d'una proprietat (⇒ tutorial).

Revirar de concèptes

Se d'unas valors, dins l'enquadrat del documentari, s'afichan en francés o en anglés, las cal revirar (⇒ tutorial).

Ajustar un imatge

Per qu'un imatge s'afiche dins l'enquadrat del documentari, cal ajustar la proprietat « imatge » a l'itèm Wikidata (⇒ tutorial).

Etapa 3 : crear o completar la pagina Wikipèdia

Aquel trabalh es mai per d'escolans que son a d'aise amb la lenga.

La Wikipèdia occitana se tròba a l'adreça oc.wikipedia.org.

Trobar la pagina o la crear

Vos cal primièr cercar la pagina Wikipèdia de l'element per veire s'existís ja (⇒ tutorial).

Se la pagina existís pas, la vos cal crear (⇒ tutorial).

Redigir l'article

Cal puèi redigir o completar lo contengut de l'article e lo metre en forma (⇒ tutorial).

Illustrar l'article

Per que l'article siá mai agradiu, podètz ajustar un o mantun imatge d'illustracion (⇒ tutorial) o una galariá d'imatges (=> tutorial).

Ligar la pagina Wikipèdia a l'itèm

Per que lo documentari afiche lo contengut de la pagina Wikipèdia, cal ligar aquesta a l'itèm Wikidata (⇒ tutorial).

Etapa 4 : versar las fotografias sus Commons

Per far aquel trabalh, cal poder escriure de frasas cortetas en occitan, pas mai.

Wikimedia Commons se tròba a l'adreça commons.wikimedia.org.

Causir las fotografias

Cal respectar lo dreit d'autor. Las fotografias que versatz sus Commons devon èstre vòstras (o lor autor dèu èstre defuntat dempuèi almens 70 ans).

Cal tanben respectar lo dreit a l'imatge de las personas. Aquò vòl dire :

Causir las categorias

Abans de versar las fòtos, vos cal causir la o las categorias amb las qualas etiquetaretz cada fotografia (⇒ tutorial). Es important per que lo monde las pòscan retrobar.

Cal mai que mai aver una categoria que corresponda a l'element Wikidata (una categoria de la persona, de l'animal, de l'obratge...). Es amb ela que lo dossièr multimèdia farà lo ligam. Se la categoria existís pas, la vos cal crear (⇒ tutorial).

Ligar la categoria Commons a l'itèm

Per que lo documentari afiche l'album de fòtos, cal ligar la categoria Commons a l'itèm Wikidata en i ajustant la proprietat « Categoria Commons » (⇒ tutorial).

Versar las fotografias

Podètz ara versar las fotografias (⇒ tutorial).

Revirar las descripcions

Se i a, dins lo dossièr multimèdia, de fotografias que son pas vòstras e qu'an pas de legenda en occitan, vos cal ajustar una descripcion en occitan a l'imatge sus Commons.

Per aquò far, recercatz la categoria de l'element Wikidata jos Commons (⇒ tutorial). Quand sètz sus la pagina de la categoria, cercatz l'imatge qu'a pas la legenda en occitan. Quand l'avètz trobada, clicatz dessús.

Se sètz sus la pagina de visualizacion de l'imatge, vos cal clicar sul boton « Mai de detalhs » (More details) en bas de la pagina.

Quand sètz sus la pagina amb los detalhs de l'imatge, podètz ajustar la descripcion en occitan (⇒ tutorial).

© Lo Congrès Permanent de la Lenga Occitana, 2018, Totes los dreits reservats